خەڵاتی کامەران

ئایا هیچ ڕۆژنامەنووسێک دەناسیت کە بە هەلومەرجێکی سەختدا تێپەڕیبێت بۆ ئەوەی ئەو چیرۆکانە بگوازێتەوە کە بەربەستە نەتەوەیی، کلتووری و ئایینییەکان دەشکێنێت و کار بۆ زیادکردنی هاوکاری و کاری پێکەوەیی دەکات لەگەڵ ڕۆژنامەنووسانی دیکە؟

خەڵاتی کامەران، بە ناوی فۆتۆگرافەری ڕۆژنامەوانی کامەران نەجم-ەوە ناونراوە کە لە کاتی ڕووماڵکردنی شەڕی نێوان هێزی پێشمەرگە و چەکدارانی داعش لە کەرکوک لە باکووری عێراق لە ساڵی ٢٠١٤ بریندارکرا و تاوەکو ئێستاش چارەنووسی نادیارە. ئەمساڵ بۆ یەکەمین جار لە لایەن مێترۆگرافی، کە ئاژانسێکی فۆتۆگرافی عێراقییە و لە لایەن خۆیەوە دامەزراوە، خەڵاتەکە دەبەخشرێت.

خەڵاتی کامەران خۆی لە دوو بەخششی جیاوازدا دەبینێتەوە:

بەخشینی بڕی ١٢ هەزار دۆلار بە هەر ڕۆژنامەنووسێک کە لە بوارەکانی (فۆتۆی ڕۆژنامەوانی، نووسین، رادیۆ و ڤیدیۆ)دا کار دەکات تاوەکو بتوانێت کار لەسەر پرۆژەیەکی درێژمەودای هەڵبژاردەی خۆی بکات. تۆمارکردنی پاڵێوراو بۆ ئەم بەخششە لەئێستاوە تاوەکو ١٨ی شوباتی ٢٠٢٢ بەردەوام دەبێت. براوەکە لەلایەن کۆمەڵێک دادوەری نێودەوڵەتییەوە هەڵدەبژێردرێت.

بەخشینی بڕی ٨ هەزار دۆلار کە دەدرێت بە خێزانی فۆتۆگرافەرێکی ڕۆژنامەوانی کە لەکاتی کارکردندا بێسەروشوێن بووبێت بۆ پشتگیری کردنیان و ڕێزگرتن لە ئەندامە خۆشەویستە ون بووەکەیان. مێترۆگرافی بە هاوکاری لەگەڵ دادوەرەکان خێزانەکە دیاری دەکەن.

هەردوو خەڵاتەکە لە مەراسیمێکدا لە شاری سلێمانی لە مانگی نیسانی ٢٠٢٢ دەبەخشرێت.

پرسیارە دوبارەکان

کێ دەتوانێت ببێتە پاڵێوراو بۆ بردنەوەی خەڵاتی کامەران؟

هەر ڕۆژنامەنووسێکی چالاک سەر بە هەر نەتەوەیەک بێت توانای بوون بە پاڵێوراوی هەیە. پاڵێوراو دەبێت زنجیرەیەک ڕاپۆرتی گرنگ و تایبەت بە خۆی هەبێت کە لەکاتی ڕووبەڕووبوونەوەی ئاڵنگاری زۆردا بەدەستی هێنابێت.
دەبێت کارەکانیان بە شێوەیەک گونجاو بێت لەگەڵ کاری مێترۆگرافی بۆ شکاندنی بەربەستە نەتەوەیی، کلتووری و ئایینییەکان و هاندانی کاری پێکەوەیی و فێربوون.

کێ دەتوانێت پێشنیاری پاڵێوراو بکات؟

هەموو کەسێک دەتوانێت پێشنیاری پاڵێوراو بکات بۆ بەخششی ڕۆژنامەنووسەکە. تۆ دەتوانیت خۆت پێشنیار بکەیت.

کەی خەڵاتەکە پێشکەش دەکرێت؟

خەڵاتەکە لە مەراسیمێکی تایبەتدا لە مانگی نیسانی ٢٠٢٢ لە شاری سلێمانی بەرێوە دەچێت.

چۆن دەتوانم پێشنیاری پاڵێوراو بکەم؟

تکایە ئەم فۆڕمی داواکارییە پڕ بکەرەوە بۆ ناردنی زانیاری دەربارەی پاڵێوراوەکە. گەر هەر پرسیارێکت هەیە دەتوانیت پەیوەندی بکەیت بە [email protected].

فۆڕمی داواکاری
مێترۆگرافی چییە؟

مێترۆگرافی لە ساڵی ٢٠١٠ لە لایەن کامەران نەجم، فۆتۆگرافەری کوردی عێراقی و سێباستیان مایەر، فۆتۆگرافەری ڕۆژنامەوانی ئەمریکی دامەزرا بە ئامانجی دروستکردنی ناوەندێکی سەربەخۆی فۆتۆی ڕۆژنامەوانی لە عێراق و هەرێمی کوردستان کە بەربەستە نەتەوەیی، کلتووری و ئایینییەکان تێکدەشکێنێت و هانی کاری پێکەوەیی و فێربوون دەدات و گرنگی بە مێژوو و فرەجۆری عێراق دەدات. لە ماوەی ئەو ساڵانەدا مێترۆگرافی دەستخۆشی و پێزانینی جیهانی بەدەستهێناوە و کاری فۆتۆگرافەرەکانیشی لەسەر ئاستی نێودوڵەتی پیشاندراون و لە لایەن هەندێک لە میدیا هەرە بەناوبانگەکانەوە بڵاوکراونەتەوە.

کامەران نەجم کێیە؟

کامەران نەجم، فۆتۆگرافەرێکی کوردی عێراقییە. ساڵی ٢٠١٠ ئاژانسی مێترۆگرافی دامەزراندووە کە یەکەمین ئاژانسی فۆتۆگرافییە لە عێراق و کوردستان.
کامەران لە چەندین دەزگای نێودەوڵەتی وەک رۆیتەرز و ئەسۆشیەیتد پرێس کاری کردووە و وێنەی بۆ واشنگتۆن پۆست، ڤانیتی فێر، زە فاینانشاڵ تایمز و چەندین رۆژنامە و گۆڤاری دیکە گرتووە.
خاوەنی چەندین خەڵات و رێزلێنانە. گرنگترینیان ماستەرکڵاسی رۆژهەڵاتی ناوەڕاست لەلایەن وۆرڵد پرێس فۆتۆوە.

  • بەشی بکە لە: